Данок за опасни крволочки домашни животни

[Кирилица] Владата подготвува закон со кој се планираат дополнителни давачки за сите газди на крволочни кучиња, на змии, на опасни влекачи и други егзотични животни. Проценките на државата се дека овие животни се опасни за безбедноста на луѓето.

Целта на овој закон е потенцијалниот сопственик да стане свесен дека ќе чува животно што може може да биде опасно за него и за околината.

     Ова е веста која беше топ вест насекаде вчера па и денес, за која многу се говореше, а сепак ништо не се кажа. Премногу (читај: сите) елементи на ова се нејасни, но сепак јас би почнал од почеток, а најмногу ќе се осврнам на според мене најбитниот дел, за опасноста на животните.

     На почеток мислам дека ова е само закон за пред луѓе, онака ко кога гости ќе ти дојдат дома ги вадиш најубавите чинии, така овој закон е само за замачкување на очите на европејците кои и делот за животните го оценуваат, па ете закон да се рече. Дека нешто многу пари ќе се влеваат во буџетот поради овој закон, баш неверувам, со оглед на тоа што чувањето животно во државава не е многу популарна ствар, особено не некое егзотично. Само не ми е јасно како со тоа што некој ќе плати данок ќе се освести дека животното му е опасно по средината, т.е. луѓето околу него? Зарем кога купуваш змија незнаеш дека има шанси да нападне некој, па мора да и платиш и на државата за да се освестиш и да си речеш „па што правам јас човече?“.

     Најбитното во овој закон е делот каде вели дека данотот е само за „опасните, крволочни“ животни. Секако после ова, ти доаѓа прашањето: „Кој е критериумот за опасност?“. Дали некој ветеринар или стручњак ќе оди да ги проверува животните дали се опасни или не и дали ќе може да одреди со 100% сигурност? Најверојатно овде станува збор за класичен стереотип. Како опасни ќе бидат означени сите оние раси кои “народно се познати“ (после стручно согледување на маалските баби, дедовци и драматизирачките теткици) како опасни, а тоа се сите оние кои „изгледаат страшно, опасно“ или конкретно како пример би ги навел: Пит-Бул, Ротфајлер, Доберман, Дога, Дого Аргентино, Стафорд, Бул териер, Кане Корсо и т.н. Со оглед на тоа што глупа е самата ставка, глупо е и јас сега да кажувам дека не се опасни, дека се зависи од индивидуата и многу други работи, кога секој нормален и бар малку учен и паметен човек го знае тоа. Само замислете, еве да речеме во САД да се воведе закон сите опасни раси на луѓе да плаќаат данок. Колку расистички звучи ова, нели? Зарем не е исто и ова со кучињата? Тоа е тоа пријатели, додека не се види како конкретно ќе изгледа законов неможеме нешто многу да дискутираме, едино да се шират шпекулации, и да се надеваме на коректен, добар закон.